بانگی حیات باشاہ صاحب اسکول، آمبور میں 77واں یومِ جمہوریہ وقار و شایستگی کے ساتھ منایا گیا
آمبور: بانگی حیات باشاہ صاحب اسکول، آمبور میں 77واں یومِ جمہوریہ نہایت منظم، پُراثر اور حب الوطنی کے جذبات سے بھرپور انداز میں منایا گیا۔ تقریب کا آغاز پرچم کشائی سے ہوا، جس کی سعادت ڈاکٹر یوسف رومی (BDS) نے حاصل کی۔ اس بامقصد جلسے کی صدارت سبکدوش ہیڈماسٹر ڈاکٹر فضل اللہ انترجامی نے فرمائی، جبکہ مہمانِ خصوصی کی حیثیت سے جناب وصی اللہ صاحب، تاجر بانگی مارکیٹ، آمبور شریک رہے۔
جلسے کا آغاز تلاوتِ قرآنِ کریم، اسمائے حسنہ اور نعتِ شریف سے ہوا، جس سے محفل میں روحانی فضا قائم ہوگئی۔ خطبۂ استقبالیہ الطاف احمد، ہیڈماسٹر مدرسہ ہذا، نے پیش کیا، جس میں انہوں نے یومِ جمہوریہ کی اہمیت، قومی اقدار اور تعلیمی ذمہ داریوں پر مدلل روشنی ڈالی۔
طلبہ و طالبات نے اردو، تامل اور انگریزی زبانوں میں تقاریر پیش کرکے لسانی ہم آہنگی اور قومی یکجہتی کا خوبصورت مظاہرہ کیا۔ قومی یکجہتی پر مبنی نغمہ نے سامعین کے دلوں میں حب الوطنی کا جذبہ تازہ کر دیا۔ اردو میڈیم اسکول کی اہمیت پر پیش کیا گیا ڈرامہ فکری اعتبار سے نہایت مؤثر رہا، جسے حاضرین نے بھرپور داد دی۔ فینسی ڈریس مقابلے میں بچوں نے گاندھی، نہرو، مولانا آزاد، سروجنی نائڈو، جھانسی کی رانی، ٹیپو سلطان، نیز ڈاکٹر، وکیل، انجینئر، فوجی، پولیس افسر اور قومی پھول کنول جیسے کرداروں کی دلکش عکاسی کی۔
صدارتی خطاب میں ڈاکٹر فضل اللہ انترجامی نے بانگی پرویز صاحب، کرسپانڈنٹ، کی تعلیمی خدمات کو سراہتے ہوئے اردو زبان میں تعلیم کی افادیت اور اس کے فروغ پر زور دیا۔ انہوں نے کہا کہ اردو میڈیم ادارے سماجی اور فکری تشکیل میں اہم کردار ادا کرتے ہیں۔
بعد ازاں مہمانِ خصوصی کے ہاتھوں طلبہ میں اسناد اور انعامات تقسیم کیے گئے۔ آخر میں مدرس کریم باشاہ صاحب نے ہدیۂ تشکر پیش کیا۔ جلسے کا اختتام قومی ترانے سے ہوا، جبکہ بچوں میں شیرینی تقسیم کرکے یومِ جمہوریہ کی خوشیوں کو دوبالا کیا گیا۔
کوئی تبصرے نہیں:
ایک تبصرہ شائع کریں